راحة البال / بقلم الشاعر حسن حفني

راحة البال
...............؟
قلت اللي عندي يا قدر
وشبعت م الموال
والصبر مني أنتحر.......
ملينا قلنا وقال
قال لي النصيب أرتضي ..
اصبر و استنه
كان نفسي اتهني بس
القسم أحوال
يا مقسمين الفرح
قولوا نصيبي فين....؟
ولا الألام والجرح..
عارفين مكاني وين
قالو زمان للفقر ...
يا فقر رايح لمين..؟
قال ده حبيب العمر....
و الفرقه للأندال
يا موزعين الهنا......
أرجوكوا دلوني
طول عمري مودي هم
واللون ده مش لوني
نفسي اكون مش أنا
و لمره خلوني
افرح معاكم يوم
ده انا همي هد جبال
يا سكة العاشقين
عاوز أعيش ليله
نفسي اكون زي قيس
وتكون معاي ليله
احب بالقنطار
و اتحب بالكيله
واتلم م القليله
وأعشق و اكون قوال
يا طيري عشك دفا
سبته ورحت بعيد
ده انا ياما شرحي وفا
ويوماتي بقرى واعيد
وانده بعلو الصوت
لما أندبح صوتي
و تعبت في سكوتي
بس السكوت أهو طال
يا حب يا أفراح
قولي لقلبي ارتاح
ريح الحبايب فاح
يلا يا فرح ..تعال
نفسي انام بدري
وابطل التفكير
و اصحى ومن بدري
زي الحمامه اطير
وارمي اللي على صدري
وأحس بالتغيير
وأرضى بقليل وكتير
فينك يا راحة البال...؟
...........
حسن حفني