( وصايا الخال 7 )
صباحك ياخال
مالك ياخال
ممكن أسأل سؤال
أنت رافض الزواج لية
لك طلب بدور علية
شرطك أية قول علية
طلبى يابنى نادر
طلبى الكل جار علية
اقولك عايز اية
عايز واحدة
مرفوعة الهامة
منصوبة القامة
ماضيها مبنى على الأصول
لسان حالها منصوب بالفضول
ثوبها مجرور وراها
وضميرها موصول معاها
تلبي النداء
وتطيع الأمر بلا إستثناء
طلبها غير جازم
وفعلها لرضايا لازم
حبى فى قلبها ساكن
وكلامها خالى من ليت ولكن
ضميرها لضميرى ساكن
تفهم بالإشارة
تاخد طبع الأمارة
من كلامي مفيش تعجب
تلبى أمرى دون السؤال عن سبب
انا الفاعل وهى المفعول
وفعلها برضايا مرفوع
السر بينا معلوم
الكدب بينا مجهول
مؤنثة وإسلوبها الإغراء
حياتها لين دون إستثناء
السكون والعطف حالها
والتمييز علا شانها
أب وأخ وباقى إخواتها
حضورهم يزين فى جمالها
هههههههه ههههههه
الله يهديك ياخال
أنت عايز عروسة
ولاعايز اللغة العربية
اللغة العربية ها ها ها
والله يابنى صعبت عليا
ضاعت وضاع جمالها
ونقص منها كمالها
من ناس كتير إتعلمت
كل القسى جالها
كاتب وشاعر كبير وأديب
قطعوا أوصالها
رفعوا المضاف إليها
ونصبوا بالواو حالها
بتبكى ياخال
أعملك قهوة ياخال
وبعدين كمل ياخال
لكن قولي ياخال
انت صعبان عليك اللغةولا ام العيال-؟
نبيل عبد الحليم
10/8/2020
إرسال تعليق