GuidePedia
ماسك القلم بنْده حروف
محتاجها توصف شدتي
أصل الألم علمني اشوف
بعنين جنابي وحضرتي
فيه حرف اهو واقف هناك
شكلُه هيقبل دعوتي
جريت عليه وندهتْلُه
بعرِض عليه إيه فِكرتي
فكّر وقال آسف ياعم
حِبرك هيوجع جتتي
إسمع ياخال مش ناقصة هم
أنا حرف ببدأ دنيتي
ولّا اقولك مش راح يِضُر
لما أكون من كلمتك
لكن أكون كلمه تِسُر
وارسم يا غالي ضِحكتك
بصيت له بصه م اللي هيا
و روحت عاوج الطَقِيه
على خدي ظهرت بسمتي
قام القلم ناطط قوام
من إيدي ثاير وانتفض
جرى إيه يا حرف
م كفايه ظُرف
لينا فضل إنك تِتحَفضْ
الحرف قام ولمحت ف عنيه رغرغه
قاله الهموم صبحت كتير
مش ناقصه كتر الدغدغه
إرسم أمل عالج أُمور
و نصيحه بس بزغزغه
على فكره دار بينا الحوار
أربع ساعات
و أوام أوام زاغ واختفى
عدى يومين ولاقيته جاي
قالي ياشاعر 
💯 مسا
محتاجني اجمعلك كلام؟
لكن بشرط
أنا وانتَ نبقى مدرسه
الشِعر تَشْعُر باللي جنبك
مش رَصْ قافيه وفلسفه
Top
إرسال تعليق