دويتو بين الشاعر الشيخ محمد شرف والشاعر الكبير خالد أمين ...... وهو عبارة عن رباعيات حيث يبدأ الشاعر من حيث ينتهى زميله وهذا هو الإبداع بعينه .....
****************
الشاعر خالد أمين
****
نهارى وليلى أناديلك
يا بدر منور أناديلك
بحبك حب مش عادى
يوماتى اقعد أغنيلك
****
الشاعر الشيخ محمد شرف
****
أغنيلك دا ليل ونهار
وأنا عايش مع السُمار
وبرضه تنادى وتقولى
أنا فى حبك دليلى احتار
****
الشاعر خالد أمين
****
إحتار قلبى مع الحلوين
أبص شمال أبص يمين
وألف وأدور حولين نفسى
ألاقى قلبى نقل ليمين
****
الشاعر الشيخ محمد شرف
****
يمين وشمال أنا غاوى
وعلى حبك أنا ناوى
تراعينى كمان أراعيك
وإنت جارحنى ومداوى
****
الشاعر خالد أمين
****
مداوى جراح ما دوانى
وكل صباح تعود تانى
احترت والله معاه ياناس
ياريت قلبه ياخد مكانى
****
الشاعر الشيخ محمد شرف
****
مكانى هناك مع الحلوين
حبيب قلبى دا حلو وزين
أنادى عليه فيزغرلى
وجوه القلب حزن دفين
****
الشاعر خالد أمين
****
دفين قلبى معاك يا زين
يابو شامة طارحة ع الخدين
بحب أشوفك راسى وهادى
وعمرك ما كسفت العين
****
الشاعر الشيخ محمد شرف
****
وعينى إنت والننى
أشوف حبك فيئسرنى
تبص عليا أندهلك
وتيجى بسرعة وتشيلنى
إرسال تعليق