*انا العاشق*
انا العاشق لضي عينيك
طمعان في نظره بريئه
نظره يمكن بتهرب
ويمكن بتخجل
تقول الحقيقه
حاسس بخوف
وظلمه وكهوف
محاوطه عينيك الجريئة
قصدي اللي كانت جريئه
******************
انا العاشق لنيلك
وياما سهرت اغني لك
والف مواويل تشبه مواويلك
واحلم ببكره واعيش الحلم
واجري واحكي لك
وابتسامتي تحضنك وتحضنيها
وحروفي تسابقني تنادي لك
تنور في عز الضلمه قناديلك
لما كان عندك في الضلمه قناديل
********************
انا العاشق لأرضك
والارض عندنا عرض
لا هي نقط على الخريطه
ولا خطوط طول ولا عرض
دا لحم ودم اختلط بالارض
بقيت جزء منك
وبقيتي شريان لدمي
لا ينفع ابيعك
ولا اهديك لابن عمي
دا لما كان ابن عمي
*************
انا العاشق لخيرك
طيري وليفك
عمره ما ولف غيرك
طيري حر في سماءك
يجوب كل البلاد
و يرجع يحن لهواك
عمره في يوم ما قدر يبعد
ولا قدر يوم ينساك
***************
أنا اللي عشقتك تاريخ وجغرافيا
واخت كبيره تحضن أخواتها
باحضان دافيه
تنشر الحب مخلصه ووافيه
يحلف الكل بجمالها
ويتمنى لاهلها العافيه
*****************
انا العاشق للكيان المحترم
اللي بيضم الجوامع والكنايس والمعابد
وقلوبه دايما متعلقه بالقدس والحرم
قلوب مليانه حنان ونفوس بتفيض كرم
مصر الحضاره مصر الهرم
******************
ناصر توفيق
القاهره في 7/2/2018
إرسال تعليق