{ صالح وفالح } / بقلم الشاعر زكريا ضاحي توفيق

{ صالح وفالح }
***************
احكيلي يا صالح ايوا يا فالح
أهل البندر عايشين إزاي؟
لابسين قمصان تحتيها بناطيل
وجزمة ببوز
أما بناتهم زي القشطة
تقولش فراولة وحبة لوز
بيحشو الجبنة جوا الفينو
ويحلّو وراها بواحده زبادي
ع الكورنيش قاعدين يتمشوا
سالي بترغي هيّ وفادي
والأهرام زي النستون بس كبيرة
السياح مالياها يا بوي حلوة بلادي
احكي يا فالح
كمل يلا دي حكاية جميلة
الأهرام زي النستون بس كبيرة
أيوه يا صالح
لسه شايفها وأنا في الجيزة
ع القهوة قعدت ويّا صحابي
جابولي الشاي في قزازة طويلة
مليانة للأخر
أشرب وأتمطَّع وأديها تكريعة
احكي يا فالح يا ابن المحظوظة
روحت البندر عايش تتغندر
وسايبني أعزق في المخروبة
أسبخ وأحرت
ونهاية اليوم شارب المربوبة
خدني يا فالح يلا معاك
اعيشلي يومين
خدني معاك يا ابن المحظوظة
*******************
زكريا ضاحي توفيق