بغض النظر
بغض النظر
كونى إنى احبِك ولا لأ
تحت الظروف الممكنة
ووسط كل الأمكنة
ولَسعَه من رمل الصحارى
وقشة فى وسط المحيط
سايقة العوج مِتْمكنة
والبعد دايم ف البعاد
والقرب مستنى الميعاد
وقلب واقف لى بالمرصاد
ويا دوب ساعاتنا بتمشى زق
وتحت حبات المطر
والتلج بيطهر ذنوب
ف عز جو الصهد
بدعى انقض معاه كل العهود
وأحط أيدى بين قيود
تنسف أساسى م الحياة
ف شرع أن الحب شريان الوجود
وف ظل إنى بعيش
حبِك معاكِ وف صمود
وتحت عرش ناس صابها الجمود
بعترف لِك
إنى وإنتِ نبض كل قلب دق
حب بنمارسه ف خشوع
رافض تملِّى للخضوع
كاهن ف محراب الهوى
دايب ف ذرات المتون
واخد سند أهل الحديث
وف سنته
مشروع قانون لقلب رق
ساكن لكل شئ مخيف
تايه معاه ف ربوع خريف
شبعان ومش طايل الرغيف
واللقمة واقفة ف حلق نار
عايش معاكِ دنيتى
ساجد معاكِ ف فرشتى
طقوس زمان صابها الألم
والخلق راضية لنا الحرام والانكسار
كل الرؤى متألمة
من فعل يوم صابه الجنون
كل اللى حب قلب مرة واتظلم
يقدر يحب نفس حبه بدون ألم
بس الألم ف إنه أصلا يبقى حب
بقلم "محمد الخضرى "
إرسال تعليق