قصيدة انا المصرى
-----------------------
انا المصرى
علمت العلوم والعلم
انا المصرى
شايل على كفوفى الحلم
اصبحت عاله
كسرنى الجوع والهم
----------------------
وشى الاسمرانى
الشمس بإديها محنياه
وكف ايدى
نحت خط الحياه
انهارده مقهور
بدور على طوق نجاه
----------------------
انا اللى التاريخ
اول ماكتب اسمى
والحضاره القديمه
مرسومه برسمى
خدتنى التوهه
بدور على ملامحى
---------------------
انا اللى زرعت
ومليت بيتك خير
ومن كتر قمحك
رميته على الجبال للطير
انهارده من جوعى
بشحت من بلاد الغير
-----------------------
بنيتك مدائن
صرح يغازل صرح
وزرعتك جناين
اغصانها كسيها الطرح
ونايم فى عشه
واكلى عيش وملح
----------------------
شط الامل
شبابنا فى بحوره غريق
وعواجيز بلدنا
موتتين كنخل العتيق
وبكره تايه
عن البيت والطريق
-------------------------
الضحكه البريئه
ماتت على الوشوش من الهم
والكلمه الرقيقه
اتحبست بين اللسان والفم
وارضنا الطيبه
فسد ترابها الدم
--------------------------
وفر دموعك
يا اللى هانت عليك بلدك
بكره جوعك
هيخليك تبيع ولدك
لما نصرت الظلم
اول مانهش لحمك
--------------------------
يا ام الولاد قومى
لمينا تانى على حجرك
ولادك الغلابه
مشتاقين اوى لحضنك
وولادك الديابه
قاعدين ينهشو فى عرضك
=============
الشاعر
مصطفى عبد المجيد
الف شكر تقبلو تحياتى وتقديرى
ردحذف