رُزْ بلاستك
************
رُزْ بلاستك على تَمويني
قال مُستورَد وفلبِّني ِ
يادي اِلحُوسَه يادي اِللُوصه
حتى اللحمه طِلعِت صِيني
صَوَّتِي يامَّا أنا مُتْ خلاص
هات شُوال قَوام غَطِّيني
كيلو القوطه ب10 جنيه
من شهرين كانت بجنيه
أه يا دُنيا مِطلَّعه عِيني
أكل إيه ؟ وأشرب إيه ؟
ما أنا غلبان مُشْ وِلد اِلبيه
اشكي وأحكي تقولوا ليه؟
كُله كويس كُله تمام
شَخَّر انت بَسْ ونام َ
طب فَرِّجني ياخُوي وَرِّيني
لما الفرخه تصبح حِلم
أشم ريحتها يادُوب ف الفيلم
يبقى كلامكم هيعشيني؟!
صَوَّتِي يامَّا قَوام غَطِّيني
أردَب القمح بتسع مِيات
والله ف جيبي جُوز جنيهات
لو أشرب مَيَّه ما تكفيني
صَوَّتِي ياما قَوام غَطِّيني
لَصبُغ شَعرِي وأبقى فِلِبِّيني
تنادي يا وَلدِي ارطُنِلك صِينِي
********************
زكريا ضاحي توفيق
شاعرالغلابة
إرسال تعليق