قصيدة /لملم جراحك
(شعر عامي)
""""""""""""""""""""""""""""""
وبتحسبيني يادنيا عايش
إيه الدليل
هو نفس طالع
والظهر محني
من همه التقيل
هي ساعات بتمر
من مر للي أمر
ودموع تشق بحور
ترسم سطور متعرجه
علي خدود الحر
وكل حلم حلمت بيه
طيف وسحاب قدام
عيوني كان يمر
وهم وخداع
وكل مره ألملم الأوجاع
وأرجع لأول سطر
بتخدعيني ألف مره
وتوهميني بعيشه حره
وتسجنيني سنين عجاف
بتحسبيني اني حخاف
ونسيتي إني من صدر أمي
رضعت قهر
الخوف ده كلمه
منقوشه في كتابي
في كل سطر
وكل طرفه من رموشي
وكل ثانيه من حياتي
كان يمر
روح إسألي الليل إلي كان
دايماً ونيسي
روح إسألي الحزن إلي كان
دايماً جليسي
فيكي يادنيا الشهد
أصبح مر
إيه دليلك إني عايش
الفرحه معدومه
والضحكه مكتومه
جسمي هزيل
تمثال نحيل
ومحنطينه صبر
معدش شيئ منه أخاف
أخاف علي بيتي
إللي هو مش بيتي
إللي تحول قبر
أصدق مين
أمي تقولي بيت جدودك
وابويا قال متأجرين
واخويا بيقول إنه باعوا
علشان يجيب لك لقمتين
متغمزين المر
طب هما فين
على الأقل كان سد
جوع الخاويين
إلي ماعاد ينفع معاهم صبر
أبويا قالها من سنين
لأ مفيش
وأجيب منين علشان تعيش
لازم نسلم نفسنا للفقر
أمي بتشحت م الجيران
وبيت الكرم أصبح جعان
وانا إلي طول العمر
بيتي ملاذ المحتاجين
كل الغلابه إلي إغتنوا
من مص دمي من سنين
نسيوا سنين الفقر
نسيوا إلي فات
وفضلت عايش ع الفتات
العيشه خل
وبعد عز شبعت ذل
أروح لمين
لما ألأسد يصبح أسير
عند إلي كان راعي حمير
وصبح أمير
مش هي دي سنة حياه
حامي الحما يصبح أسير
عند الحفاه عند العراه
صبحوا رجال
وبيشتروني بالدينار وبالريال
بتبيعني ليه يابا
لأشباه الرجال
نسيوا إلي فات لما بقوا
أصحاب مصانع وعمارات
أصحاب قصور
أصحاب تحف وإكسسورات
وفضلت انا عامل أجير
وأمد إيدي وأقوله هات
حقي عليك
ولا أنت ناكر للي فات
يقولي حقك يابني مات
أترجى فيه
لجن الأخوه لقمتين
يرد يقول أخوة إيه
إنت حقير
آخرك تكون عندي غفير
فرشك تراب من غير سرير
وخساره فيك حتي الحصير
أخوة إيه
إنتوا أخوات متفرقين
أختك بتخدم ف القصور
وأخوك بينحت ف الصخور
والباقي واقف في الطابور
وابوك بيرهن أرضكم
وقبض تمنكم من سنين
متفرقين. !!!
ركبت فوق الريح
قوام علي بلدي جريت
ألاقي أمي بالسواد
واقفه بباب البيت
صرخت يمّا إيه جرى
لما سافرت سبتك غزال
متحنيه ومشيت
قالتلي سافر ياحسن
إرجع قوام مكان ماجيت
لا الأرض سارت أرضنا
ولا لك مكان ف البيت
اكبر خواتك معتقل
وواحد إتصاب بالخبل
قلبي خلاص مليان علل
إللي قتل وللي إتقتل
بإيدين أخوه
وبدم بارد
يصرخ يقول
انا البطل انا البطل
ليه الميزان صابه الخلل
رديت وقلت ابويا فين
يمكن يكون هو الأمل
ردت أبوك باعنا خلاص
سابنا ونايم في العسل
يما قوليلي إيه حصل
ولا أنتو مين
لعنه صابتنا
ولا جايز محسودين
طول عمرنا متجمعين
من بطن واحد مولودين
ياما محن مرت علينا
ولا عمرها كانت بتفرق
مين فينا أحمد ولا مينا
وكل محنه بيلمع
الأصل إللي فينا
لو يوم نغيب أو نفترق
بإشاره واحده ترجعينا
ولا أحنا ضلينا المسير
(حسن اللأقصري)
إرسال تعليق