بسم الله..
أول كلمه ف قلب قصيده تساوى حياه..
ثم الآتى..
جهز قلبك وإظبُط نبضك على كلماتى..
إسم قصيدتى (مِيت إحساس)
حُب وضحك ودمع هاينزل يملىَّ الكاس..
فيه فلاح كان شايل فاس..
عايز يزرع..
عايز يقلع...
عايز يقطع مليون راس..
راس الظلم مع التهميش ..
راس الذُل مع التطنيش..
قاعد يسأل نفسه كتير..
إزاى أزرع قمح ياناس..
ويبهدلنى طابور العيش؟
فيه عيِّــان كان لابس خِيش ..
أكتر كلمه بتطلع منُه أنا معاييش..
وأما بيدخُل للمستشفىِّ..
يقرا ليافطِة عَدل مافيش ..
كَت مكتوبه بإيد فنان..
ساعة بيكتب ساعه بيرسم..
ساعه بيبكى علي ندمان..
أصل بُكاه على حُب قديم..
حُب بجد حزين وأليم..
حَــب وهو مايملك حتى ولا مليم..
قلبُه حقيقى كان بالحُب كتير مليان ..
كان بيقول لها إنها جنه وبر آمان..
كان بيبُـص ف حُـضن عيونها ..
يدخُل عالم أصغر وصف إليه 'بُستان '
يشبه رسم الورد لخدها 100 'فُسـتـان'
مات الحُب بضربة خوف..
ساكنه قلوب الناس رامياهم جوه ظروف..
أو مظروف..
مش مفهوم ولا معروف ..
مين الكاتب أصلاً ليه؟
مين المُرسل حتي إليه؟
مين الرايح مين الجاي ؟
هات العود وكمان الناي..
يلا هانعزف عَزف طويل..
إنت هاتعزف ع الأوتار..
قلمي هايعزف حرف جميل..
واللي يدوس علي عزف قلوبنا يخُش النار..
واللي يطنش يعني حروفنا يعيش محتار..
واللي هايقرا بدون تركيز..
صعب يميِّــز بين الورده والصرصار..
إقروا ياناس..
إقروا كلام معجون إحساس..
واخد درع وألف شهاده ومليون كاس..
سامع نغمه ف قلب حروفي؟
شايف خوفي؟
خوفي لا يمكن مره يبان..
خوفك عايش ف الحرمان ..
خوفهم طايل كل زمان..
خوفنا جميعاً راح دُكان..
يشتري لحظة خير وأمان..
أخدوا فلوسه ..
قالوا مفيش..
قاموا عاطوه بالباقي 'لبان '
بقلم.. محمد عسل
إرسال تعليق