{{دنيا قلابة}}بقلم رمضان العلالقة

يا دنيا قاسية و قلابة

أحلامنا فيها كدابة

نخفي الجراح لكن برده

الجرح يعزف بربابة

أحكي يا دنيا إيه مالك

إيه اللي غير أحوالك

توهنا و تاهت خطاوينا

و تهزي فينا بغربالك

اضحك و أنا المهموم بيها

أحلام بريئة تضميها

و أفرد قلوعي ف بحورك

الضحكة باهتة أتاريها

و تجري بينا ما تهدي

أيام طويلة و تعدي

سهرنا ياما ف لياليكي

ماسكة في أيدينا و تشدي

نسهر ف ليلك ما نامشي

لفين يا دنيا رح نمشي

الموج عالي علي شطك

خلاص معانا ما تفرقشي

أنسي يا دنيا و أنسينا

لا بحر فيكي يودينا

غرقنا ف بحر و دوامة

بلاش تشدي ف أيدينا

لا مينا ف بحرك و لا ليلك

مراكب و ماشي و تغييرك

غير ملامحك في عنينا

نبكي ما خفف منديلك

يا دنيا قاسية و قلابة

هنروح لفين إحنا غلابة

الدمع بحر على خدودنا

يمسح دموعنا مين يا با