GuidePedia
دنيا سقاها الموت بطعم الخريف
قلبي ارتعش يا ناس وقلبي ضعيف
ما خافش م الموت بس اخاف م الفراق
وجع الفراق قاسي وليله مخيف
..............................................
باحلم انا واسرح كتير ف السما
فراشة طايرة وزقزات ملهمة
وفجأة ذكرى تنط على فرحتي
احس الوانها بقت مؤلمة
.............................................
دقيت بيبان الامل
..قالوا الامل ع الجبل
..شلت الهموم وطلعت
..وقع الجبل ما احتمل
...............................................
فرعون بنى صرحه وظنّوه اله
عبدوه بهايم او عبيد للحياه
واللي انكوى بالنار وداق العذاب
اللي عرف ربّه وعقله هداه
..........................................
فيه ناس عشان اللقمة ترضى الهوان
وناس عفيفة اليد والجوف جعان
لقمة تشبّع طعمها بالشقى
ولقمة تمضغها تزيد حرمان
..........................................
علّي حيطانك يلّا وكتّر الزنازين
واحبس الوف لو كانوا ليك عاصيين
وان عوزت ناس للصورة ارسمهم
والا اشتري تماثيل من الفاترين
..........................................
حكمك يا قاضي الارض مش معدول
كفة ميزانك لسّه مايلة لدول
يا تصون وتحكم باللي قاله الكتاب
يا تكون ورا رأي العباد دلدول
..........................................
بياع حلاوة وحلقي علقم مر
انده بعلو الصوت لمّا حد يمر
دوّقت كل الناس حلاوة عجب
وعجبي عمري ما دقت الا الصبر
.........................................
عيش يابن ادم قد ما راح تعيش
ان كنت باشا مشير او باش شويش
فيه خلق تسوى رغم فقر الهدوم
وخلق مهما تتكسي متساويش
Top
إرسال تعليق