الـباب يـفــوت جـمــل للشاعر إسلام جـنـدي

/الباب يفوت جمل/

........................

الباب يفوت جمل وانت عليك تختار.

لتعيش حامد ربنا وتكمل المشوار.

لتغور بعيد عننا وتخبط دماغك قوي في اتخن جدار بالدار.

غلبنا ندادي فيك وانت بليد إحساس.

ركبك شيطان خناس.

رامي بعرض الحيط كل نصايح الناس.

ندرن علي إما تمشي هقفل وراك الباب بالضبه والترباس.

وهكسر وراك ١٠٠ زلعه زلعه ورا زلعه بالشومه وي الفاس.

أصل انت نفسك خبيثه (طبع)ما حد ضمنها.

سوء النوايا فيك قلبك بطبعه ختمها.

طبع الخباثه نابش بداخلك ماحد غيري فهمها.

كتير رمتنا بالبلا (زور) بس ربك سترها.

وجيت تداري خزوتك بضحكه صفرا الكل كشفها.

زي اللي راح يكحل عيونه فبطرف صبعه طرفها.

طب سبني أحكي واقول والعبره بالمقياس.

هل مره جيه العشا وكملت عشاك نوم.

دا كان غداك لحم وكباب وحمام محشي بلحم مفروم.

ولا انت نمت مره متآخر وقمت ناقص نوم.

ولا طلبت السلاطه ونسينا فص توم.

طب سبني أحكي واقول والعبره بالمقياس.

هل قالوا بكره صيام وصمت على جوعه. 

دايما سحورك قشطة وعسل ومربى وي زبادي. 

وكنت بتاكل بنهم حتى الآذان ينادي.

مطرح ما يسري يمري وحصوه في عين الأعادي

وشبه وملح وفسوخه ورافع لربي الأيادي.

طب سبني أحكي واقول والعبره بالمقياس.

هل قالوا بكره عيد وعيدت جربوعه.

أبدا كان العيد يهل ودولابك من الزحمه يئن.

إشي أحمر وأصفر وشفتشي وبرده كنت تزن.

ونعولك على الأرض تمشي كل خطوه ترن.

وجيوبك من كتر الفلوس منفوخه ولا مره على حد تحن.

وكل دا ودا وضربلي دايما بوز.

عاوز تغور غور بكره لينا تعوز.

وساعتها بس تعض على إيدك وتلعب عصا وأرجوز.

وتقول يارتني هديت ورضيت ماكات حياتي لوز.

و زمان قالوا في المثل المركب اللي تودي تاخد ولا تدي.

واللي ما يعرف فضل أمه عليه بكره مرات ابوه بالعصي تضرب وتدي.

...........................

اسلام جندي

...........................