الناس اللي بوشين « للشاعر يوسف الحمله »

-5:02

الناس اللي بوشين « للشاعر يوسف الحمله »

لا يا صاحبي خليني أعيش

ومترمنيش في قلب الهيش

وتقولي كمان أتدرى وعيش

وأبعد عن الشرطة والجيش

أنا وياك في أول لهطه !!

وبعدها دغري على الحرم !!

أطهر وأرجع زي البفطه !!

أبني مسجد وأسس هرم !!

واربي دقني واعلق يافطه

مكتوب عليها كلام محترم

أصل شعبنا شعب طيب

بياخد الدين بطول الدقن

وكمان دمع عينينا قريب

وبناخده في العضل حقن

الناس عايزة الكلمه الحلوة

اللي تخفف عنها البلوي

اللي تلاقي فيها السلوي

وأنا متعلم فن الدعوة

من برهامي وإسلام بحيري

وأنا علشان براعي ضميري

بكره الناس هتقولي يا شيخ

وأي كلام هقوله هايمشي

سمك .. تمر هندي .. فسيخ

هي الناس فاضيه تركز

وحياتك لأكون عكاز للناس

والناس هتسند عليه وتعكز

وإن قلت الحشيش حلال

حلال علشان أنا بشربه !!!

وإن قلت الحشيش حرام

حرام علشان أنا بحرقه !!!

وبكره هتثبت لك الأيام

إن بقيت أشهر إمام

ولى سيره ذاتيا وكتب

بيحكوا عنها في الإعلام

تعرف يا صاحبي

كل ما زاد تخلف الناس

كل ما حققنا كتييير أحلام

ولو ساد العلم ما بين الناس

والله وتالله هننداس بالأقدام

سيبني أحاول أعيش الدور

سيبني أخد خطوة لقدام

وان ضاقت بيك العيشه تعالى

أنا عامل كل حاجه بإحكام

فتح مخك ومتقفلش معايا

خلينا ف اللهطه الأولى كفايه

البلد دي على وشك الإفلاس

والعين علينا يا ابن الناس

وطول ما احنا يا صاحبي

بعيد عن الشرطه والجيش

في الهنا هنعيش ونعيش

ونقلل بس طمعنا شويه

علشان الناس تعرف تعيش

ونزود الأمراض في المنتَج

ونلهي الناس بالفن الهابط

وكام رقاصة تافهه ومنتِج

إحنا بتوع الديــن في العلن

وفي السر محصلناش الخزرج

إحنا بوشين ماشيين حلوين

واحد منشد .. والتاني مهرج

يالي بتسأل أنا ليه بوشين

إسأل نفسك ... إنت مين؟؟

قبل ما تغلط غلطة عمرك

وتقوم قيامتك وإنت مدين

ومتقوليش انا ليه بنصحك

ما أهو أصل ده طبع ؟؟؟؟

.................. أبو وشين !!!!

وأكل عيشي يحتم عليَّ

مع إن عارف

إن الكدب ملوش رجلين

بِسْمِ اللهِ الرَّحْمَنِ الرَّحِيمِ

كَبُرَ مَقْتًا عِنْدَ اللَّهِ أَنْ تَقُولُوا
مَا لَا تَفْعَلُونَ (3) ﴾
( سورة الصف )
صَدَقَ اللهُ العَظِيمُ

الناس اللي بوشين

بقلم الشاعر يوسف الحمله