{{ بس هس ياقطة بس }} بقلــــــم سامح لطفى

بِسْ هُسْ يا قطة بِسْ
إوعي أسمع ليكي حِسْ
الحيطان فتحت ودانها
والديوك هجرت أدانها
والجدار بقى مش جدار
ألف مخبر في المدار
راح يعدُّوا أي هَمْس
بِسْ هُسْ يا قطة بِسْ
اوعي أسمع ليكي حِسْ
الودان صارت كبيرة
فُضِّنا من أي سيرة
مصطبة أو قول حصيرة
واللسان ف النار يِدِسْ
بِسْ هُسْ يا قطة بِسْ
اوعي أسمع ليكي حِسْ
خلِّي يومك راح يعدي
بطَّلوا ناخدْ وندي
لو بودك أو بودِّي
مصر ع الأحزان تعدي
لو يسد البق جبسْ
بِسْ هُسْ يا قطة بِسْ
اوعي أسمع ليكي حِسْ