في بيتنا ام سماح ,,,الحلقه الاخيره بقلم عمر لطفي فرج

وقفنا امبارح بعد مغامره البحث عن السجاير الروزمان في كارفور ,,,وخلاص جبناهم بحمد الله وحارجع البيت ,,

,طبعا شعوري وانا راجع بقمه السعاده وطعم الانتصار حلو اوي ,,وعمال اسمع والله وعملوها الرجاله ,,,,وجابوا الروزمان لبلدنا ,,والمصريين اهما ,,

وتقريبا لمحت حماده هلال عمال يشدو ولقينا السجاير الروزمان ,,اللي علي علبه مكتوب عليها روزمان ,,وكله لام سماح ,,

,وداخل بأه عالشقه وانا سبع عضنفر قاطع طريق ,,,لقيت الدنيا ساكته خالص ,,,خير هما راحوا فين ,,لقيت مراتي ,,بتقولي هوا انت اتاخرت ليه ,,اتاخرت ايه ده انا اخدت بتاع نص ساعه علي ما لقيت الروزمان ,,

,خلاص يا باشا وقتك خلص ,,,ام سماح وقتها ضيق خالص والسكديول بتاعها كوندينسد ,,هيا خدت سجارتين سوبر فرط من عم عويس البواب وخلصت نفسها ,,نعم سجارتين فرط وسوبر طب ما قلتش ليه ,,

والخناقه بتاعتي علي الروزمان دي ومغامره كارفور,,وام التسعين جنيه ,,,والوقت ده كله في الطراوه يعني ,,,,,معلش اصل وقتها ضيق وانت كده حتلخبط لها الترتيب بتاعها ,,

,عالعموم في داهيه خلي الواحد يرتاح شويه ,,,لسه حادخل باه اتفرج عالتليفزيون ,,لقيت مراتي بتصوت ,,انت حتعمل ايه ,,,حاعمل ايه انا داخل الليفنج فيه ايه ,

,راحت فقعاني احلي قصيده عصماء عن ان التعب اللي شافته هيا وام زفته سماح في تنضيف الشقه واني كده حابوظ كل اللي عملوه ,,وكمان حتدوس عالسجاد بالجزمه,,هوا انت قد كده مش مقدر المسؤليه ,,

,مسؤليه ايه انا داخل اقعد علي الكنبه في بيتنا ,,مش داخل صالون التشريفه في قصر عابدين ,,وهوا احنا بننضف البيت ليه مش عشان نقعد فيه والا عشان ما نقربش منه ,,,,لا مش حينفع انت اخرك وعلي استحياء اوضه النوم بس واحتمال الحمام للضروره القصوي يعني ,,غير كده محظور عليك التواجد في اي حته في الشقه ,,علشان تفضل نضيفه للضيوف اللي حيجولنا في العيد ,,

,هوا انا اساسا كنت تعبان من مشوار كارفور ده ,,ودماغي بتوعجني ومش فاضي لخناقه ,,,فرحت داخل اوضه النوم ,,وقلت انا انام شويه ,واما اقوم فريش كده ابقي اتخانق بتركيز ,,

,,باقلع هدومي وباحطها في الدولاب ,,وانا باحط الساعه بتاعتي في الدرج لقيت الدرج فاضي وانا كنت حاطط فيه الصبح بتاعه 300 400 جنيه كده ,,قلت هما جابوا ايه وانا مش موجود ,,,انا تقريبا اشتريت كل حاجه ,

,,ناديت مراتي ,,,انت اخدتي فلوس من الدرج ,,,اه طبعا مش لازم ام سماح تاخد اجرتها ,,,اجرتها اجرتها ايه دي تقريبا قعدت ساعتين خدت كام يعني ,,,,قالتلي لا ماهو النهارده يوم اسيشيال ,,وكمان هيا جت لي مستعجل فاخدت بس 350 جنيه ,,

,,نعم ,,,,ليييييييييييه ,,,هيا عقمت البيت مثلا,,والا حططته في الاوتوكلاف ,,انتي مدركه انتي بتقولي ايه ,,ايوه وخدت كمان 50 جنيه حق تاكسي العاصمه اللي حيوديها البيت اللي حتشتغل فيه ,,

,حسيت ان ضغطي علي ,,وان انا مش في فورمه الخناق دلوقتي ,,الاحسن اني انام شويه خصوصا اني صايم ومش حينفع اخد راحتي في الخناق الا بعد الفطار ,,

,,دخلت نمت احسن ما يطق لي حاجه ,,,,واعتقد اني لو شفت ام سماح دي تاني احتمال اقتلها هيا وسماح اساسا ,,,,,

والي اللقاء العيد اللي جاي باه ,,اللي في الاغلب حاغتال فيه ام سماح