لما بكتب عن شعورى ناحيتك
بلقى قلمى سحابه بتمطر كلام
والقى عودى وحده لحن ضحكتك
والقى جسمى بيرتعش حب وهيام
حتى قلمى بيبتسم لك بانبهار
وانتى شعرك مستخبى فيه النهار
زاد ف حسنك.. زاد وقار
واما بكتب
عن شفايفك.. بسمتك
ببقى عايم جوه شهد من الرضاب
وابقى طاير من هناكى وفرحتك
من سعادتك
فرحتى تطول السحاب
وابقى خايف انى اغرق
شطره منى تنكسر وانسى الميزان
وما بكتب عن جمالك رقتك
بلقى نفسى احلى عازف عالكمان
حتى شوقك
لما يقطف دمعتك
اجرى الملم ياحبيبتى الكهرمان
وما بكتب عن عيونك
واللى فيهم من غرام
ببقى عايز فيهم اكتب 100 ديوان
والقى ايدى ف حضن ايدك
نيل بيجرى من الحنان
إرسال تعليق