*عدى ياسيدى* بقلم رضا ابو الغيط

*عدى ياسيدى*

عدى ياسيدى واحنا معاك
أُؤمر تلقى الشعب وراك
نبنى بلدنا نعيد أمجادنا
مصر بلدنا بتستناك

امسك طرف الخيط بإيديك
تلقى الدنيا تقول شبيك
مصر بلدنا لينا وليك
اما لغيرنا مصر هلاك

احضن نجم الليل العالى
احلم تبقى هناك ف العالى
مصر بلدنا نور بيلالى
فرح كل الشعب معاك

ارسم صوره مصر ف قلبك
واعرف انى يا سيدى بحبك
مصر بلدنا كمان بتحبك
انت وكل اللى وياك

آدى مشاكل عاوزه حلول
عرفك راجل أد القول
حِل يا سيدى إنت المسؤل
انهض بيها واحنا معاك

آدى الدفه وآدى المركب
أدف يا لا شرق غرب
بكره بلدنا لينا تقرب
إبدأ يالا واحنا معاك

أوعى تقصر أوعى تهمل
بكره معاك نبنى المستقبل
طول ما إيدينا مع بعضينا
بكره بلدنا هتكون أجمل

شمس الدنيا هتكون لينا
ضيى قمرنا مستنينا
نبنى بلدنا نعلى ونعلى
ونحقق كل أمانينا

يالا نعلم كل ولادنا
نبنى كنيسه بتحضن مدنه
وقت الجد نكون أبطال
وقت السلم نعيش الهدنه

يالا نخضر كل الصحرا
نروى بلدنا الحلوه السمرا
نزرع ليها كل غيطانها
نبقى الغصن وتبقى الزهره

ابنى مصانع افتح بابنا
شغل لينا كل شبابنا
تلقى تروس المكن الداير
خير بيعم كل أحبابنا