عندما اتذكر طفولتى يربطنى الحنين بالسير على اقدامى وامشى من خلال بوابة الفتوح او بوابة النصر للمرور على منطقة الجمالية وسك العملة وسوق الليمون والبصل والنحاسين وحارات ورش الدهب والمشغولات الذهبية والانتيكات والصدف ياه ايام كنت عايش فى حضن عم احمد المكوجى وحضن عم محمد الخضرى وعم احمد الجزار والشيخ مدحت والشيخ احمد ومدرسة عمر مكرم اللى كان فيها اخويه ونسيت شارع الموازين ياه كأنى كنت هناك امس كل شىء لم انساه بل محفور فى وجدانى وعقلى كتير اوووى اشتاق الى السير على اقدامى وفى النهاية اكل رز باللبن وام على او بليلة باللبن اللى كان والدى يأكلها لى يوميا عند الملكى تحت البكيات زمان ايام عشتها وترعرعت على احضانها انها حقيقة لا تنتهى ولا تنسى من عمرى انها اجمل ايام حياتى مع الحاج عبد العزيز والدى واصحابه وجيرانه والدى الله يرحم الجميع وكان عم نجيب الحلاق يجى علشانى انا واخويه بالشنطة علشان يقص شعرنا دا حبيب والدى وكان مسيحى وكان ليه اصدقاء كتير مسيجيين بس عمرنا معرفنه الفرق بينا وبينهم ابدا الشهامة واحدة والرجولة واحدة والخوف على بعض والمودة مع بعض والتزاور مع بعض هو ايه اللى حصل وووصلنا لكده ازاى هل علشان احنا طيبين ولا علشان سلميين والسوس الخارجى نخور فى اصالة الشعب المصرى من غير مانحس ولا نفهم ولا ايه ليه اتغيرنا واصبحنا كده ليه دا ام نعيم اللى ربتنى مع ولادها وتنت مارى وعم كامل ساكن بيتنا والله انا محسور ومهموم هتقولى تكنولوجيا هقول لاءه الثوابت لا تتغير ولكن شىء ما واخطاء اصابتنا وفيروسات وميكروبات غربية امرضتتنا لازم نقول الحقيقة وبدون كسوف ونواجه الحقيقة بالتحدى والارادة المصرية من اجل التعافى والخلاص من هذه الآفات نعم من السهل اقتلعها ولكن عندما يكون لنا عزيمة وارادة وصبر من اجل اولانا واجيال قادمة وشباب لم يعاصر الزمن الجميل ياريت نرجع نقول غنى فقير مسلم مسيحى انا مصرى مش مهم انا منين اذا كنت نوبى اسوانى بحراوى فلاح صعيدى عرباوى مش مهم المهم انا ابن بلدى مصر علشان كده هنقول كلنا تحيا مصر الابية الحرة تحيا مصر
إرسال تعليق