أستسمحك
من ديوان / البيت القديم
للشاعر / مصطفى فريد
أستسمحك ٠٠٠
بزيفه يزحزك عن سكتك
ويكتفك ذل السنين
ويشل ايدك
خليك جدع
الخوف جبان
زعقه واحدة تموته
وتخرجه من بين وريدك
والقوة لو من غير زئير
ميكروب. بيفسد ملمحك
باستسمحك
إياك وجهر الصوت يموت
ويغلبك ضعف السكوت
وتنسى تار إللى انقتل
بإيدين وحوش متأسسه
على شرب دم الأوليا
صحصح لأصحاب الأذى
والشعوذه ٠٠٠
من سكرانين ٠٠٠٠
وملحدين ٠٠٠
واللى راكبين الدقون
واللى سارقين الطحين
باستسمحك ٠٠٠
تقفل بيبان الغشاشين
والكدابين جوه الشاشات
والعاهات ٠٠٠
الحاضنه حضن المغرضين
جوه البارات
والرقاصات متحزمين
بحزام أفاعى ملولوه
لأجل اللى مات
متوضين بالغش
وبزيف الآيات
باستسمحك ٠٠٠
ماتسبش غيرك يخدعك
وبخبث أخباره اللئيمه يوقعك
وفى عز عز الانبهار
تدوق مرارة الانهيار
أصرخ وفوت
دوس على صدر السكوت
وانطلق من فوق براكين النهار
خلى مراكب شمس بكره.
ترجعك ٠٠
وتعيد حلاوة الإنتصار
أصرخ بصوت ٠٠
قبل ما يفوت الأوان
وتعيش بتنزف م الندم
جوه تابوت الانكسار
إرسال تعليق