دولاب الصبر
_________
كنت قايدلك
قلبي ف عز الحب شموع
عدا قصادك عمري الباهت
من كتر الأشواق حرمان
ياما خدتني عنيكي لحد الليل ولاجاش
ياما قالتلي تعيش وعشانك قلت اهوعاش
أدي الوقت ف غمضة عينك مر سكات
وأنا بالذات
من أسبوع بستنى محطه لحد البيت
واما بغيب بالساعه يدوب تتعد عتاب
وانتي غيابك بالأسبوع
ولسه قايدلك قلبي ف عز الحب شموع
يللي قفلتي القصه عشاني ب ١٠٠ مفتاح
أدي دولاب الصبر قصادك
أول رف عتاب وجراح
أما التاني قصيدة شعر غرام وحنين
كات مرسومه بضحكة وفرحه و عمر يفوت
نص كلامها إزاي الحب يعدي سكوت
وانتي أديلك شهرين وأكتر
كل يومين على نفس الحال
كل يومين راح اقابلك بكره
عدا ف بكره الجاي شهرين ولا فيش مواعيد
يللي عيونك قبل الصبح بتصحى تملي تصحى الشمس
أمته الليل يفرد جناحاته لباب الشوق
واخدك بين احضاني واطوف من نفسي وافوق
واشرب ضي الروح ف لقاكي بدون معاناه
يللي رسمتك جوه وريدي موت وحياه
وكنت قايدلك قلبي ف عز الحب شموع
كنت واهبلك خوف القلب عليكي حنين
عدا قصادك عمري الباهت من كتر الأشواق حرمان
بقلمي ( احمد هلال )
إرسال تعليق