بصيص امل
''''''''''''''''''''''''''''''''''''' .. عوني هشام
وناس وناس ضاربه كاس
ونفسين بتقلب اى راس
خطاويها ماشيه بدون اساس
وحكاوي فيها المسخره
واهى دنيا فيها كل لون
فيها الفجور فيها الجنون
فيها حب معاه شجون
وخطاوى بتشد لورا
عايزين عقول تقدر تسوق
مش زار وحبه من النشوق
لازمنا كارثه عشان نفوق؟
ماتفوقوا يا أهل المنظره
بايديكوا ضايع حلمنا
كسرتوا عمدان عشنا
وتجار بتنهش لحمنا
فوق كتافنا احمال كتير متسطره
اقول كمان عايز كمان
واغنى على كل اللي كان
فين زمانا من زمان
كانت الشوارع مبخره
مش هاقول مين فينا خان
الكفه ضاعت م الميزان
احنا فين ضاع المكان
حتى الحروف متحيره
تروح يمين تقلب شمال
ترسم شجر يطلع خيال
العدل تاه الظلم طال
عايزين شوية فلترة
وقف ا لقلم فوق السطور
والحبر عاصي عن الظهور
حتى الورق صابه الفتور
محتاج لحتة صنفره
-------------------
....... عوني هشام
رد على منشور الاستاذ هشام الجوهرى
إرسال تعليق