أنا زبال:
بقلم المهدي العمري
أنا زْبَّالْ يا ناس أنا زبال
و لِيَّ الشرف نكون زبال
نّْقِّي الأرض من زبلها
ما نخْلِّيها توصل لهبالها
لِّي ما يحترمني
هو زْبْل و قلبو زْبْل
و بلا زبال وسخك يثقال
صدرك يعيش هذا محال
علاش تحتقرني يا بشر
على ريحة انت درتيها
علاش فالدنيا ما توقرني
و أنا نقيك من أحمال
أوساخ بها الأرض طليتيها
إيلا ظروفي خلاتني زبال
هذا قدر يعتقك من هبال
صرفتيه على الأرض شلال
وسختي الأرض و مرضتيها
و بِيَّ الخالق يعتقك من لْهْبال
إيلا تحب الوطن خصك تحبني
تبوس إيدي فيها تراب الأرض
نْقِّيتْها بحب و كان هذا عيدي
واخا إيدي فيها وْسْخْك
ما نمدها ليك إلا مغسولة
و تمد كلام ذباح قتال
به تصير نفسي معلولة
تعصر أعماقي آلام
و أحاسيسي تصير مذلولة
أنا نسبح فبحور أوساخك
و انت تسب و تعيب
و أفكاري تصير مشلولة
هذا قدري أنا زبال
و لقمة العيش يا ناس
نوصل ليها بالحلال
و انت يا ملعون
تسوق الدلال
يا حقير قلبك أوسخ
ما فالأرض يكون
عامل نظافة سميوني
و لا قولوا زبال
عند الله آ تلقاوني
أرقى العمال فالحلال
ما شي سراق و رشايوي
ما شي ظالم حكار
فارد بقوتي ظلال
أنا رحمة فالأرض
أنا ولد الحلال.
......................من توقيع المهدي العمري.
إرسال تعليق