.............(( أحــلى خِــلــقــة شــوفــتــهـا )).............. ,,.. إهـداء إلى
= = = = = ( ذكـريـات يـوم المـيـلاد ) = = = = = = ,, مـروان .. ويـوسـف
================
يوم الميلاد واللي جرى .
كان يوم رهيب مليان خطر
لكن بفضل الله أقول .. ربك ستر
كان يوم نهاية .. ويوم بداية ..
ويوم مواجهة .. ويوم ما عمره ف بال خطر
كان يوم حقيقي معتبر
واهو جيت خلاص .. وبقيت أنا بينكم نفر .
شوفوا الخلاص يا من حضر
دكتور دا واللا شيخ خفر ؟!
شايلني بالمقلوب ورجلي هتتكسر !!
طب ليه بتضرب ؟! ..
... دا انت شكلك محترم .. ما ترضاهاش
مش عيب عليك ؟ كلك نظر
راجع بتضرب بالقوي ؟
خليك ظريف .. وبلاش كدا
صرّخت .. فرحوا .. وزغرتوا .
الناس دي مالها مدهـولـة بالشكل دا ؟
غطي اللي نايمة والنبي .. يادي الكسوف .
شدي الغطا بشويش عليها م الحروف ..
ما تخضهاش
دي احلى خلقة شوفتها ..
.. وأنا لسه بتهجى المناظر .. والعيون بتشوف طشاش
حب العرق لولي مزوق وشها .
وريحتها شداني قوي ما بنسهاش
ودوني حبة عندها .. حبة كمان
حطت شفايفها على خدي بحـنان .
حسيت بنبضة قـلبها شـلال أمان
نفس الموسيقى .. كنت بسبح جنبها أيام زمان .
كل الأيادي بلهفة بـتـقـلـبـني !!.... إيـيـيـيـيـه ؟
والـدم ده عـلى جـسـمي لـيه ؟
هو احنا كنا في معركة ؟ ... مـاسـكـيـني لـيـيـيـه ؟
طب انـتـو مــيييين ؟
اللي بتمسح جبهتي بإيدها الشمال
واللي بتفتح هدمتي بإيدها اليمين
وانا عـيني ع الحـلـوة اللي نايمة تـبـص لي بأحـلى عـنـيـن
وعنيها شـداني لها من غـير إيدين
بصيت لها .. ضحكت .. ونامـت مـتـعـبـة .
نـوم العـوافي للأمـيرة اللي مـانـامـت من يـومـين
ودوني نمت ف حـضنها
ونعست على صوت الحنين .. لما لقيتني في الأمان
نـفـس المـوسـيـقى ..
.. كـنت بـسـبـح جـنـبها .. أيــام زمــااااااااا
=======================
محمد المصيلحي عودة
إرسال تعليق