لحظة خِصام النفس / بقلم الشاعر محمد الخضرى

لحظة خِصام النفس

وأما أفتِكر لحظة لُقانا
وإفتراقنا مَلحمة
ساعة غروب الشمس 
فى وقت الشروق متحطَمَة
ومحطمة معاها القلوب والأمكنة
متحكمة ف كل الزمن
متمكنة ف دور الإله
هدِّت كيان الحب عبر الأزمنة
لحظة غضب
وقت إنهيار كل الظروف
متألمة بأتفه جروح
متفهمة معنى الحروف الخارجة
عن كل إحتمالات الألم
إحساس شرود العقل
فى ساعْةْ الجنون مستسلمة
وكإننا عايشين ف لحظه مُحرَمَة
أنِّةْ ألم متألمة بِْكىِّ الجروح
رغم اللى باين إنى مشفى بالطموح
لكن الصحيح كُتر العلاج
يديك مناعة مُقنّعة ضد الشِفى
ويزيد آهات تصرخ ف لحظة عشقها
من وقتها
ولحد حرفى ما يوصلِك
بَوَصَلِك
لبَر كل المجروحين
إتحملى لحظة صراخ وسط الجبال
وإتعشمى يبقى لصرختنا دوا
دا لو ماكنشى الصرخة برضوا مؤلمة
لحظة خِصام النفس تُغدر نفسها
أيه لزمته أصلاً فراق
وليه من الأول لُقا
أزمة نفوس متفرقة مع بعضها
دايرة وفاضحة نفسها جوة النكد
تبقى النفوس متهجنة
متأثرة بإسلوب حياة
ومثبتة فينا الخُطا
أمير جماعة مُغلقة
نفِّذ أوامر حتى فى وقت العبط
مسرح كبير وممثلين أخر لَبَط
ومن الشرود طالعين بفكرة صغيرة
بتحمِّل النفس البريئة فوق طاقتها
تُقف تروس الحركة فيها
وقت ماهى بتنطلق
أيه يفترق
صابنا الفراق ف عز ما إحنا بنتحرق
من نار لذيذة كلها برد وسلام
تحمى قلوب العاشقين المخلصين لحظة فراق
ويتحرق بنار عذابهم آمال فريدة مُحصّنة
بقلم "محمد الخضرى