في المرايا بلاقي نفسي / بقلم الشاعرة هناء حمود

في المرايا
بلاقي نفسي
حد تاني موش عارفني
حد تاني كتير كارهني

حد هد الحزن حيله
حد طاطي كتير جبينه
حد تايه جوة ضله
حد كاره نفسه
واللي حتي منه

حد قاسي وحد ناسي
وحد ف الدنيا يقاسي

حرب دايرة جوة قلبه
ع اللي راح
واللي كان
واللي توه روحه منه
ولا عمره حبه
ولا مرة اداه الامان
ولا كان بقربه

حد من براه بيضحك
ضحكه تطلع بالاسية

حد تاني موش عارفني
حد كاره دوم يشوفني

حد طيب
حد سلم قلبه للي
عمره يوم ماقدره
واللي عمره ما مرة
حبه
ولا كان قريب
منه لحظة و فرحه

حد لابس مية قناع
يداري بيهم
الام كتيرة
وحزن مزود
جرح قلبه والاوجاع

حد كاره يشوفني
جوة توب الجدعنة
عاوزني البس توب
جديد
توب ندالة وملعنة

حد تاه الفرح منه
وحد مات جواه أمل

حد ضاع العمر منه
جرحه بقي موش محتمل

حد كان يحبس دموعه
وحد كان الحزن طوعه
حد متعلم في وشه
كل تجاعيد الزمن

وهي دي اخر الحكاية
بقيت بشوف نفسي
تملي موش انا
بقيت بشوفني
وكارهه صورتي
جوة توب المسكنة

بقيت بخاف
المحها مرة
جوة مرايتي
ماهو اصل صورتي
تملي تطلع
موش انا

هناء محمود...ام عبير