كده كتير .../ بقلم الشاعر سيد صادق

كده كتير ...

لما الدمع يحني الضهر ..

و يبان فينا شكل القهر ..

لما يعدي علينا الشهر ..

من غير خير ...

يبقي كتير 

لما حياتنا تبقي كئيبه ..

لما تروح من بينا الطيبه ..

و لما الحلم بيطلع خيبه ...

بدون تفسير ... 

يبقي كتير 

لما بكره بيشبع موت ..

و القوت دايما جاي بشروط ..

لما نقضي حياتنا سكوت ...

خوف م الغير..

يبقي كتير

لما امبارح يتعاد تاني ..

لما اليوم بيفوت ف ثواني ..

لما دموعي تكون سبقاني ..

ف المشاوير 

يبقي كتير 

لما جراحنا بتزيد جرح

وتنسي حياتنا شكل الفرح 

لما نموت من كتر الشرح ..

و في تقصير 

يبقي كتير

لما وجعنا بناكل منه ..

لما الصبر بنشرب منه ..

لما العمر بيجري أكنه ..

نفخه كير... 

يبقي كتير 

لما عشانا بيكمل نوم ..

لما نصوم مش وقت الصوم ..

لما يعشش فوقنا البوم ..

و تقولوا خير !!!!

يبقي كتير

سيد صادق

Sayed Sadek