قلبي م الوجع حجر / بقلم الشاعرة هناء محمود

قلبي م الوجع حجر
بقا احساسه متأيد
ومتأخر

لاعاد بيحس بالدقة 
ونسي نبضتة جواه
وبقا عايش
علي تكة

دا كان اطيب من الطيبة
وكان ارق من الرقة

وكان بيحب كل الناس
ويتمني يكون الخير
متفصل توب
لاعمره يدوب
ومظبوط ظبطة وبدقة

لكنه كان يفوق من حلمه
ع الواقع
يصحي الجرح جواه
متين مرة

ويسقيه
الحقايق ظالمة وكمان مرة

انا القلب اللي كان
يطرح جناين حب وبكترة

انا القلب اللي كان ينسي
جراح الغدر
ويرجع تاني لبياضه
ونقاؤه مابين غمضة عين
وبين نظرة

انا القلب اللي كان يتحس
انا القلب اللي كان يتشاف
ابيض حتي من جوة

هناء محمود