(على فين ) / بقلم الشاعرة هناء محمود

(على فين )
اهرب بس واروح علي فين
ما انت ملكت الروح والقلب
وساكن جوة ف نن العين
انت البلسم وانت البسمة 
وقت شجوني
انت سعادتي وانت الفرحة
وانت جنوني
كنت ف حالي وعايشة وصابرة
كنت بدادي في جرحي وبنسي
قلبي في زحمة ناس عايشين
جت برضايا خطفت لي قلبي
جت بمزاجي وقلت لي حبي
اديت اولدر للدقات
تعلي وتعلي وتعلي
ف قلبي
تعرف قلبي ازاي حبك ؟؟
ومتسألش
اصل انا معرفش
كان النبض ف قلبى اهو مات
ولا كان ابدا دق لحد
جيت صحيته من غيبوبته
جيت واديته احلى هدية
حب ولهفة مع الملاغية
كلمة وقلتها ليا في مرة
انتي حاجة عندي مهمة
رد عليك قلبي بنبضه
وانت حبيبي
والجاي وبكرة
جاي دلوقتي وتقولي اهرب!!
مهما حاولت اهرب وابعد
كل مكان بلاقيك اودامي
ساكن جوة قرار احضاني
مالك قلبي وكل كياني
اهرب بس واروح علي فين
ده لو انطفي نوري من العين
هحيا بنورك
وامشي بنبضك
مانا دوبت وقلبي انا حبك
اهرب بس واروح علي فين؟؟!

هناء محمود...ام عبير