{{ أنَا الفَلاَّح ------------ }} كلمات الشاعر أحمد شاهين -- مصر - أسيوط

أنَا اللي بَشُق الأرض تِتْبَسِّم
وِتضحَكْ لِي أنَا الفَلاَّح
أنَا اللي بفَاسِي أنَا بَقَسِّم
وِبَقُول يَا رَبِّ يَا فَتَّاح
هِنَا بَرْوِي هِنَا بَجْنِي
وِبَتْبَسِّم فِي لِيل وِصَبَاح
اِلأرْض اِلنَّاشْفَه بَقِت خَضْرَا
مَا بِين اِلحِيضَان وُرُود خُضْرَه
وِعَ الجِنَاب 200 شَجَرَه
وِمِين يِرَاعِيهَا غِير اِلفَلاَّح
وِمِن قُطْنِي بَلَبِّسْكُم
وِمِن قَمْحِي بَغَذِّيْكُم
وِمِن فَاسِي بَأَكَّلْكُم
وِبَتْمَنَّى لِحَالْكُو صَلاَح
وِبَتْمَنَّى صَلاَح اِلْحَال
وَادِي القِرْدَان مَعَايَا صَدِيق
بِيِسْعِدْنِي فِي يُوم مَا تضِيق
وِدَيْماً يِسَاعِدْنِي يِنَقِّي الدُّود
وِيرْسِم لِلسَّعَادَه طَرِيق
وُجُودُه مَا يسَاوِيه الْمَال
وِلَو هَتْحَلِّي هِنَاك فَاكْهَه
تِرْمِي همُومَك عَ اللي خَالِقْهَا
مَعَ مَنْجَى وِبَطِّيخ تِنْسَى
وِتَحْت اِلنَّخْل بتِلْعَب اِلاَّطْفَال
وِبَغْرِس فِي الْعِيدَان بِيدِي
وِبَسْقِي الزَّرْع بِوَرِيدِي
دَه انَا اللي غَنَّى الكَرَوَان
فِي يُوم عِيدِي
وِبَتْمَايِل مَعَ الْخَيَّال
مَادَام فِي الأرْض قَنْدِيلِي
وِغْمُوسِي مِتْعَبِّي فِي مَنْدِيلِي
وِم اِلْمِجْرَى انَا بَشْرَب
حَتَّى العَصْفُور يغَنِّيلِي
هَحْتَاج فِي إيه الْمَال
وِبَتْمَايِل مَعَ الْخَيَّال
ــــــــــــــــــــــــــــــــــــــــــ