مشكلة / بقلم الشاعر صبري علي

#مشكلة.

(1)

ف عينيكي نور..

وانا من شهور..

حاسس عينيّة مزغللة.!

خفّى الضيا يا طاغية..

حكايتنا لسّة مطوّلة..

يا قاتلة 'فاض الحلا..

صبحت اغير م المكحلة.!

(2)

هاكون صريح..

عاشق أنا, فعلا صحيح..

وكمان جريح.

ونصيبى م الشّوق اكتمل.!

شاعر يجوز..

لكنّى برده مش "أمل".

ولا كنت "بيرم" أو"صلاح".

دا انا قلمى مكسور الجناح.!

بيعانى زيّى- اوقات كتيرة - من الملل.!

وبيتكسف ,..

إزّاى يوفّى عينيكي دولا حقها..

وازّاى يغوص جوّة الفؤاد..

ومشاعرى -حبّة- يزقّها.!

فبيرتجف..

وبعد حرفين يتقصف.!

ويدارى سنّه م الخجل.!

يشطح كتير, يسرح كتير..

ويتنّه ساكت بالشهور.!

يفضل يلف على الورق, 

وكمان يدور.!

يعمل متاهة م الأحاسيس, والشّعور.!

واتوه معاه, وافضل وراه.!

لعلّ شطرة.....تكتمل.!

إحساس رهيب..

لمّا المشاعر تنحبس فى قلب شاعر..

قلمه لسّة بينتظر..

كام حرف, وشويّة أمل.!

(3)

ألف مليون معذرة ..

يا ساحرة..

مش قادر اكتب عن عينيكى..

عينيّة لسّة مزغللة..

وبيقابلنى ف كلّ حرف..

 ألف مليون.......مشكلة.!!!!

صبري على

مارس17