قصيدة:(من وجع)
…………………
وبكتم اها من وجعي
وبمسح سرب من دمعي
لكن أعمل ايه
ما ده قدري
وهو ده اللي مكتبلي
هعيش انا فيه وحن اليه
عذاب مربوط أديني انا بيه
لكن امتا هتفك واتحرر
سنين بتعدي من عمري
وانا كل يومين بكبر
بعيش ايامي متعذب
ولما تسألني عامل ايه
بتردد انا و بكدب
وبقلك بجد تمام
لكن جوايا انا مجروح
انا المقتول انا المدبوح
انا الحاسس كإني فراغ
انا العايش حلاوة روح
انا اللي عملت قلبي مداس
انا اللي كرهت صنف الناس
انا المحتار انا المحتاس
بس اعمل ايه انا يعني
هعيش مكبوت واعيش مجروح
لكن مش هقبل انا أبدا
اكون نسخه ولا اكون مسخ
ولا لعبه اساسها رباط
ولا هقبل اكون بلجام
ومش هقلك انا ڤندام
انا واحد بجد غلبان
لا ليا شرط ولا لسته
ولا طالب من التركه
أنا طالب أكون إنسان
أنا طالب بس إني أعيش
ولو حتى على البقشيش
عايز أكون أنا مبسوط
ومعيزشي تاني أكدب
وعايز أقول بصدق تمام
……………
بقلم الشاعر/ هشام الدكر
إرسال تعليق