لو مستاق .... للشاعر العامى / رضا أبو الغيط

                                  * لو مشتاق *   ........  شعر :  رضا ابو الغيط

* لو مشتاق *
لو مشتاق لعينيا صحيح
كنت عشانها تسابق الريح
أصل كلام الحب مابينا
مش محتاج فيزا وتصريح

لو ها تقولها برمش عينيك
تلقى عيونى ترد عليك
لا انا محتاج اسمعها اتقولها
ولا راح أدارى حبى عليك

حُبنا ساكن جوا قلوبنا
وهواك هو اللى مدوبنا
لا انا محتاج الناس يقولها
ولا محتاج لكلام يتعبنا

قولها ياروحى فين ما تكون
راح توصلنى فين ما اكون
اصل كلام الحب ما بينا
أقوى كتير من أى ظنون

قولها ما بينك وما بين نفسك
راح اسمعها يا روحى ف همسك
انت حبيبى وما فيش غيرك
يقدر كده ف الحب ينافسك

عمرى ما بااسمع غير صوت قلبك
حتى ف بُعدك با أكون جنبك
لو مش سامع قلبى وصوته
يبقى الذنب يا روحى ده ذنبك

                                                                  مهما الغربه مابينا تطول
                                                                 مش محتاج لجواب او كول
                                                               قولها ما بينا ياروحى لروحك
                                                                وبلاش يبقى ما بينا عازول