من وحي الصوره
( آه من بعادك)
كل يوم احلف ما اعدي من هنا
ع الحال دا بقالي كام سنه
وكل يوم لازم الاقيني هنا
من كام سنه
علشان هنا آخر ميعاد بيني وبينك
وآخر لقا كان مابين عيني وعينك
آخر كلمة حب سمعتها كانت هنا
يا حبيبي
الطريق اللي مشينا يوم عليه
كل مره يسأل عليك
والفنار اللي نعدي من عليه
وحشته لمسة ايديك
حتي عصفورنا اللي طاير في السما
نفسه في نظرة عينيك
ياحبيبي
الجزع دا شاهد اصيل علي حبنا
مكتوب عليه جوا قلب اسمنا
الجزع دا علي عشقنا حالف يمين
كان بيبقي ف حضننا م الشمال و م اليمين
وهو بينا مستحي مسبّل عيونه
يسمع كلامنا يغني غنوه بالحنين
يا حبيبي
الورده ال انت زرعتها ولا شوفتهاش
معاديتش ترقص في الهوا وورقها باش
دبلت غصونها ودمعت سألت عليك
هو ليه من يوم ماراح لسه مجاش
عهد مني ارويهالك و ارعهالك
وعمري ابدا مقطفهاش
ياحبيبي
ياللي كنت ف يوم حبيبي
ياللي لسه بردوا حبيبي
ياللي دايما انت حبيبي
رحت ليه و سيبتني للذكريات
رحت ليه عيشتني جوا الآهات
عايشه فيها وعايشه فيا
من يوم ماقالولي خلاص حبيبك مات
آه من بعادك
خلا قلبي عليك ينادي
خلا لون الدنيا يبهت ع الرمادي
بس انا عارفه الحقيقه وبالقدر
انا قلبي راضي
يا حبيبي
⊙⊙⊙⊙⊙⊙⊙⊙⊙⊙⊙⊙⊙⊙⊙⊙⊙⊙⊙⊙⊙
محمود ناصر
إرسال تعليق