GuidePedia
إرجع يازمان
رَجّع فِينَا الإنسان
رجّع لينَا الأمان
رَجّع كل اللّى كان
وارجعْ يازمان
رجّع فينا اللّى راح
الطِيبه والسمَاح
رَجّع نور الصبَاح
يملا الكون حنان
وارجع يازمان
رجّع فِينا الشهامه
والعزّه والكرامه
وحاجات كتير يامَا
راحت مع النِسيان
ماترجع يازمان
إرجع وبلاش تتأخّر
الحلم بِيبتِدى يتبَخّر
والناس نايمه بِتشَخّر
إرجع صَحّى النعسان
إرجع يازمان
رَجّع فِينا الأخلاق
رجّع زَمن العُشّاق
والحُب والأشواق
والفن اللّى كان
إرجع يازمان
رجّع فِينا الأمانى
رجّع ضِحكتنا تانى
نضحك ولو ثوانى
نِنسى مُرْ الأحزَان
وارجع يازمان
رجّع صوت السَواقِى
مَيّه بِتروى الشَرَاقى
رجّع كل اللّى بَاقى
م الخير بتاع زمان
وارجع يازمان
رجّع من تانى اللَمّه
وفرحه كبيره لَمّا
نِعدّى أى أزمَه
رَجّع حُب الجِيرَان
ارجع يازمان
رجّعنا إيد بإِيد
وفَرحة كُل عيد
نبنى وطن جديد
يعلَى فوق الأوطان
ماترجع يازمان
رجّع سَهر الليالى
ونجُوم فوقنا تِلالى
وقمر ينشِد مَوّالى
على لحن الكرَوان
إرجع يازمان
Top
إرسال تعليق