{{ كلام مغلوط }} بقلم الشاعر رضا ابو الغيط

ان كان ع الهدمه دى بنت اصول
ملبوسه ف يوم جنى المحصول
لا شافتها عيون ولا حتى صابون
أقلعها ازاى.....وده شيئ معقول

ع الجته الهدمه بقالها سنين
لا قالت لى انا مين ولا حتى انا فين
معقوله يا ناس مات الاحساس
علشان أرميها.. انا بعد يومين
انا ابن اصول ما اعرفش ابيع
واخاف أخلع هدمتى ..لأضيع
لا بحب الزيف.. ولاحتى الليف
ولا حتى بآمن ........بالتطبيع
لابس دمور ....لكن مستور
وبحب المشى يا ناس ف النور
لا اعرف ف الكدب ولا التزوير
ولا عمرى باألف يا ناس وأدور
انا قاعد دايما ويا الغيط
ابدر ف القمح وأشيل شُبيط
لا اعرف هرمون ولا خرم ازون
ولا عُمرى بحب أنا التنطيط
من بعد الفجر انا ع الحوال
ودماغى شاغلها ألف سؤال
على ايه الناس تقتل ف الناس
وضميرهم ساكن أى شِوال
فسألت حُمار ف التوته مربوط
على ايه فرحان .من إيه مبسوط
إدانى بالجوز.. زى الأرجوز
وقال لى .....كفايه كلام مغلوط
من يومها لبست يا ناس زعبوط
وأقلع ميت هدمه ف نص الشوط
وإن حد سألنى ......كيفه الحال
أفرد ف الوش ....وأقول مبسوط
وزرعت الغيط كوسه وقلقاس
وقفلت الخشم بميت ترباس
وناويت ما أسألش أى حمار
حتى لو ضاعت.. منى الفاس
لا بقيت عتريس ولاحتى ونيس
قاعد مزعور من غير فوانيس
مش فارقه كتير مع جنس حقير
لو يوم أحلامنا تصير كوابيس