{{ نداء من مواطن }} بقلم احمد شاهين

أعلنت إضرابى عن كل شئ فى الكون
تعبولى أعصابى جعلونى كالمجنون
الناس غريبه أوى لا معنى لا مضمون
دايرين دايمآ فى ساقيه ومتعصبه العيون
روتين مالى حياتهم ولحد يوم مماتهم
فيه جمله برددوها . نكون أو لا نكون
وإزاى هتكون يا صاحبى ؟
وإنت عمال بتحبى
فى سكة الجنون
العيشه صعبه أه . ما أصعب الحياه
وإنت عايش بدون
بدون أدنى حقوقك
ومش شايف طريقك
وضباب بيملا الكون
عايش ومش عايش
إنسان على الهامش
وغرقان فى الديون
كل حياتك فاتوره
وليها أصل وصوره
يا الدفع يا السجون
أعلنت إضرابى عن كل شئ فى الكون
تعبولى أعصابى جعلونى كالمجنون
خناق فى كل حته والناس مش طايقه بعض
دا بيه لابس جاكته ودا متمرمغ فى أرض
مفيش أبدآ عداله
وزهقنا م القواله
وكأن الظلم فرض
يا بلدنا مفيش مثالك
ومين يعدل ميزانك؟
ويحس بكل نبض
أعلنت إضرابى عن كل شئ فى الكون
تعبولى أعصابى جعلونى كالمجنون
مُتعلم بلا وظيفه
وجاهل بيشتغل
شباب زى الورود
قاعدين من غير عمل
أهاليهم ياما صرفوا
عليهم لما إرفوا
وضاع ليه الأمل ؟
شهاداتهم بروزوها
ع الحيطه وعلقوها
والحلم ما إكتمل
أعلنت إضرابى عن كل شئ فى الكون
تعبولى أعصابى جعلونى كالمجنون
يا ريسنا يا غالى
الله يكون فى عونك
يا شايل مسئوليه
وغرقان فى ديونك
بناشدك كمواطن
يا جوا القلب ساكن
تحس بالغلابه
تشيلهم فى عيونك
تطهر البلاد
م الظلم والفساد
ونقول دا الحق عااااد
يا ريس على إيدك
أعلنت إضرابى عن كل شئ فى الكون
لكنى عندى أمل وياريته بكره يكون.