{{ دار مسنين}} بقلم د. عمر عبد الجواد

دار يا دار ..يا دار
يا دار قوليلي ...يا دار
مين مين ..مين ساكن يا دار ؟
و من جوه الدار .. ردت عليا سنية.
.لا هيا كبيرة ...ولا هيا صبية
و قعدنا نحكي شويه
و قالتلي وكان الكلام ليا :
سبتني ...وانا وحدانية .
وارتحت منا و رحلت عنا
وانا لا حول ولا قوة ليا
لا ابني بيفتكرني..
ولا حتي بنتي بتطل عليا
اروح لمين ..في السن ده
وأقول يا مين.. يسأل عليا .
وما صار غير الدار دي ليا .
لما قالولي مولودك ولد
انشد حيلي وقلت يبقالي سند
لما كبرت وجسمي اتهمد
ما لقيت بنت ومالقيت ولد
والدمع مالي عنيا .
انا عشت عمرى ليهم
كنت أمهم ..وكنت كمان ابوهم
اطبخ واغسل ..ولا يوم اكسل
ومهما تعبت ...ما عمري اسال
يساعدني حد فيهم.
كانوا هما دنيتي..
بضحكتهم تعلي فرحتي
وبطلتهم تنور بسمتي
و كانوا ضي عنيا ..وكل حاجة ليا
ولما كبروا ..عني رحلوا
و ما عاد حد يسأل عليا .
يا ما سهرت ..ويا ما قسيت
بره و جوه البيت
لا يوم كليت و لا مليت
و لا مرة لحد اشتكيت
وآخرتها م الوحدة سبت البيت
وما عاد غير الدار دي ليا .
ليه كده يا قدر...؟
الحزن جوايا انفجر
قلبي على ولدي انفطر
وقلب ولدي عليا حجر
يا تري السنين راحت هدر ؟
ليه يا زماني قاسي عليا .
المولي سبحانة قال
المال و البنون زينة الدنيا
لا شفت منهم مال
ولا م البنون حتي سؤال
ودنيتنا فانية بيهم وبيا .
وحدتي هانت عليهم
و بستجدي النظرة ليهم
يا تري ياربي ادعيلهم
ولا هيهون عليا ادعي عليهم ؟
خلاص يا دار ..بكفاية عليا
زودت اسايا ..و مليت بالدمع عنيا