مداعبة بالأقلام بين الشاعرة الراقية / فاطمة عقل و على عمر
" عن أحوال وطباع الناس " اتمنى ان ينال اعجابكم
مع خالص تحياتى لكم اصدقائى الكرام ...
" على "
حيـرنى طبـعك يا أصـيل
كلك خيــر ومعدنك نبـيل
مقامك عالى كيف نخيل
لكن بختك مع الناس قليل
" فاطمة عقل "
جيت اشكى..
واشكى لمين؟!..
من صاحب فى الاصل
مش صاحب...
باع الود..
وعلينا ديما جاحد
ومن مين؟!..
خساره اشترينا
ناس خايين..
وده من هم الزمان..
يا معين...
" على "
وياما هنقابل ناس فى السِكة
فيهُم عُملة نادرة وفيهُم السَكة
اللى شاريك عمره ما يتغير
واللى بايعك يستنى لك تَكة
"فاطمة عقل "
شوفنا ياما كتير وإتعشمنا فيهٌم
هان ودنا ولا طمر الخير فيهُم
ناس فاشوش لابسين وشوش
وساعة الجد ما تلقى حد فيهُم
" على "
وقال ع الطيبين انهم خِلصوا
لا ابدا ده عشان كتير فالصو
الدنيا صحيح ماهياش غابة
لكن الديابة زادوا ولا نِقصوا!
" فاطمة عقل "
عمر الطيبين ما يوم هيخلصوا لاء
دول عمله نادرة ضد وشوش قادرة
حماهم الله والبسهم ثوب العدل و الحق
روح يا ناكر المعروف يجيلك يوم وتنشق
"على "
يا طيب وتوبك توب الحق
مديت الايادى قالولولك لاء
مديتها بالسلام وقلبى رق
وانت شايل خلاص ما تطق
" فاطمة عقل "
حتى السيرة تلقاها ماهيش هى
العيب فيهم ويقولك الدنيا مش هى
يا قلوب حجر صوان طب كيف تلين
طبعى زين لكن .حاسب مانيش هَفية
" على "
رضيت بيك يا هم وانت ليه مش راضى
جبال احزان شيلتها على إكتافى وراضى
ياللى صاحبتك و على الحلو المر قاسمتك
اقولك سامحنى ؟ تقولى لاء نتحاسب ع الماضى !
"فاطمة عقل "
ولسه من طبع الناس يا ما هنقاسى
واشرب من الزمان مر كاسى
رميتونا ليه بالشوك يا حبايب
وانا اللى باطيب جراحكُم وأواسى
" على "
ولسه بنحكى عن طباع الناس
ناس كيف الوسواس الخناس
وناس جواهر ودهب وماس
وناس معاها مال ولا لهم ساس
" فاطمة عقل "
جالنا الهم ورضينا بيه وكمان مش عاجب
مليان حمول وزكايب هموم اه يا زمانى
ياللى جيبتلى الصاحب الخاين من تانى
وقولت اسامح واصالح وكمان مش عاجب!
إرسال تعليق