فى قلبى لك مكان
محمد ضباشه
بكرا تحسى بفرق كبير
بين هوايا وبين هواكى
وساعتها هتلاقى فعلا
قلبى جاى يسكن معاكى
وقلبك يقول أنا ليك
ونسيت اللى زرونى
وتوهونى فى حب وهم
وسهرونى وعذبونى
وكنت فاكره انه حب
خدنى بكلام معسول
من غير ما أفكر لثانية
مشيت وراه على طول
ولما حسيت بحبك
قلبى قام يرقص قوام
والشوق فى القلب يصرخ
والعيون كرهت تنام
وأقول معقول حبيبى
الحب اللى فى عنيك
كل دا علشانى انا
وأنا طبعا حاسة بيك
ياريت ترحم عذابى
طمنى أبوس ايديك
أنت فعلا يا روحى
حبى ساكن حته فيك
ولا ناوى تزور وترحل
زى عالم كدابين
فرشولى الارض حنه
وزوقوها بالياسمين
لكن كله كان كلام
الصدق أتقتل جواه
وفتح فى القلب جرح
بيبكى على ليلاه
ولا أنت حبيبى غيرهم
حبك صادق صحيح
فى القلب يبان حقيقى
لا فى عذاب ولا تجريح
ويداوى بقايا جرح
عذبنى طول الليالى
لما كرهت الحب
وفضلت بقلب خالى
لولا عيونك خدونى
لجنه ما شوفتهاش
وأحلام فى القلب نبتت
حياه ما عشتهاش
لكنت قفلت بابى
وقلت للحب لا
وحذرت قلبى منك
أوعى تروح وياه
لكن وبجد راح
للآحلى حب فى حياتى
ساطع والشمس طالعة
واسهر وياه ليلاتى
وخلى حياتى جنة
وحلاوتها على الشفايف
وعيون صادقة وأمينه
بتطمن قلب خايف
لا أنت حبيبى غيرهم
كلك طيبه وحنان
ساكن جوه فى عيونى
وفى قلبى لك مكان
إرسال تعليق