سألته وف وشّى إبتسام..
هوه إحنا إمتى ؟؟ والساعه كام؟؟
بصّ ف البعد المسافر ف المدى ..
وإبتسم بسمه ف أرغولها الرضا..
صنعلى دهشه..وإنفجر فيّا الكلام
قالّى قولى ..كمّلى ..
الليله انتى والقمر بتفسروا الاحلام..
ضحكت بالدهشه اللى فيّا وقلتله..
هوه إحنا بنّقى الكلام..!!؟؟
طبطب عليّا بكل حب..
حسيت بإن ف إيده قلبه..!!
وإبتدا يبدأ معايا الخطوه والفرح ف عينيه..
يشاورلى ع الأماكن ..يحكيلى تاريخ صباه..
يقول هنا ..أنا كنت بلعب ...
لعبة المسّاكه والرابط عينيه..
وهنا كات خالتى آمنه وكلبها دايماً ف تيِه..
لو حدّ خطّى الغيط وعدّى..
تقولّه إمشى ..كان يمشى يهجم
ع اللى بتشاور عليه...!!
وأقوله إيييييييه؟؟
يقولّى عمرى جوّه منى ..
وعشان بحبك لازم أحكيلك عليه..
أضحك...ويضحك..ونجرى
ف الأرض الوسع جوزين حمام
وأقولّه قول...يقولّى إييييييييييه..
هوه إحنا بنّقى الكلام ؟؟
معرفش كام م العمر عدا؟معرفش كام؟
لما إتفاجئنا بالوجع..
وإتفاجئنا بالخصام..
كات روحى ساقيه..
وروحه كات شريان أمان!!
أصبله النيل يبدره...
تغرق شقوق الأرض وتخضّر غيطان..
دلوأت فين؟ رقص العصافير
والغنا فوق العيدان؟
ولّى زمان الزقزقه؟؟ولاّ غابت من قلوبنا
نبضة الشوق اللى كان؟؟
معرفش كام م العمر عدا؟
معرفش كام؟
كنت أشوف روحه تغازلنى وكأنها..
كائن وجودى وله وجود..!!
كنت من غير ماالمح ملامحه أسمعه..
عازف بيعزف بالوجع غنوة شرود..!!
كل دا ولّى ف طيّات الغيوم؟
أعصر اليوم بالمحبه ..ألاقى معصور المحبه
عصيره نازف بالهموم؟
أرفع عيونى للسحاب...
ملاقيش ف صفحة رؤيتى غير الغياب؟
وأنتظر..وأنتظر..وهفضل جوه إنتظارى
لحد ماافنى العمر ..أو يعود قلبى اللى غاب..
أو يعود....قلبى اللى غاب...!!
.............................................
نبضة الشوق...
من ديوانى الاول
كلماتى \\ إيزيس غانم
إرسال تعليق