كل مافيا
بيمُر عليّا خيالك
بخرج م العالم واسرح
والاقيني ف عز دموعي
وخداني الضحكه وبفرح
أومال لو كنت قصادي
ومعايا ف نفس المطرح ؟
دنا كنت أهد الدنيا
وابنيها مكان يجمعنا
وازرع م الفرحه جناين
مافيهاش دمعه بتو
ونعيش أنا وانت عليها
ولا حد يشارك فيها
كل الحكايات نحكيها
من غير حد ما يسمعنا
أرسم بالإيد تفاصيلك
ترسم بإيديك تفاصيلي
وأكون ف السكّه دليلك
وتكون ف الحُب دليلي
نزرع أشواقنا جناين
ونخيل وشجر وطيور
والشمس تبُص تعاين
ترمينا بكل النور
وتسيب العالم ضلمه
تفضل على طول بصّالنا
وتخاف م الناس تحسدنا
على طول ترميلنا بخور
وانا كل دقيقه ارقيك
وأضمك بين أحضاني
تفضل جنّتي ف عنيك
يفضل قلبك عنواني
وأحس بكل ما فيّا
بيدوب من لمسة إيدك
وتبُص بشوق لعنيّا
ألاقيني لوحدي بزيدك
ونقضّي حياتنا غرام
على طول طول الأيام
ونهار ما عيونّا تنام
ف الحلم تجيلي واجيلك
وده بس ان مر خيالك
بخرج م العالم واسرح
أومال لو كنت قُصادي
ومعايا ف نفس المطرح ؟
.............................
إرسال تعليق