تعالى نتحاسب بقلم الشاعر أ/رضا ابو الغيط

تعالى نتحاسب
تعالى نقرا ف المكتوب
وبعديها يا روحى نتوب
ونرمى ف الهوى همومنا
وتتفرفط ما بينا ذنوب

ما أنا ذنبى انى حبيتك
وصدقتك وداديتك
ووهبتك كده قلبى
وياريتنى..... ويا ريتك
يا ريتنى ف يوم ما صدقتك
وطاوعت القلب وطاوعتك
ولا عديت حدود الشط
ودُقت الحب وعشقتك
يا ريت الخطوه كات لامت
ولا مشيتهاش
ولا قلبى عرف قلبك
ورحت بلاش
أنا الغرقان ف بحر الشوق
ومستنى حبيبى ما جاش
أنا اللى عمرى ما نزلت
ف الهوى مايه
وف الغرام درجاتى كات
خمسين ف الميه
عملت أناسباح وأخرتها
غرقت ف شبر من مايه
فاكره يوم ما انا شيلتك
على كتافى
وكنتى لسه ف اللفه
وبتخافى
وعشان قلبى اللى يوم حبك
وهبتك كل ما أملك
وقلبى ليكى كان صافى
عملتى ايه بقى ليا
يا هجرانى ونسيانى
غيردمعه ساكنه ف عنيا
بتبكينى ووجعانى
لا نازل بحر الهوى لأجلك
ولا أعدى
على شط الغرام تانى
كلامى عشان أكتبه ليكى
سهرت الليل
وشوفت الويل
من حروف الكلام ليا
حروفى بتلومنى على حُبك
وصعبان عليها الدمعه ف عنيا
يا اللى الذنب كان ذنبك
خليتى ليه بقى بيا
تعالى نقرا ف المكتوب
ونتعاتب ونتحاسب
ولا تحاسبى على قلبى
ولا تستنى من قلبى
أنا يحاسب
ما طول العمر يا عمرى
بتسقينى كاس المرار ألوان
وف الآخر.... أنا أحاسب
رضا أبو الغيط