( سنه واسبوع )
ـــــــــــــــــــــــــــ
سنه وأسبوع
وساعتي داخله على واحده
وم الوحده
بعلق كل بروايزي ف جدار صامت
واكلمها على واحدة
سابت ليلنا يقضيها بفكر حزين
ولا بتسأل
سنه وأسبوع
وعمري اللي اتفرم في الخوف
بحاول اسرقك منه
لكنه عصاني بالمره
واخر مره راح اقولها
وحشتيني
طب إيه رأيك في حبة قهوه وقصيده في نص الليل
وتحكيلي العتاب كله
ونسند شعرك السايب على كتفي
وكام ضحكه من اللي كتير كانت م القلب
ماانا يمكن ماقصرتش في شيء لكن
سنه واسبوع كتير جدا
في عمر ماعادش عنده ضمير
وخوفي لبكره يسرقنا من الاحلام
سنه واسبوع بلف ف وش كل الناس
وبخطّف نظره م الحاضرين
واقول هيّ
ف صوت بنوته بضفيره
ورنه كعب في الشارع ولا بتجيش
تعبت خلاص من الاشواق
سنه واسبوع ويوم كامل باقيلك لسه فيه ساعتين
اعاتب قلبك الخواف بكام جمله
واغازل فيها تسريحتك
وأقول الشعر ف عينكي
واغير بدلتي واخرج اكلم نفسي كالعاده
واروح الشارع المعتاد وابص هناك
الاقي الحلم كله سراب وانتي مافيش
( احمد هلال )
إرسال تعليق