كلام وله معني
بقلم محمد ضباشة
وبير المعاني غويط
الليل بيتوسم نعاس
إنشالله جنب الحيط
والحلم ليه إنداس
بسكينة سرقانا
يا مقسمين الدموع
نهاري ليه بيشيط
الخطوة ترجع ورا
مع ليل بيتسابق
ويا كلام فشخرة
من الوهم ما هو لاحق
سفين بيد قصيرة
جوه الهموم راشق
والطل فوقه مندي
لكن ما طال الغيط
جربت أعيش منكسر
لقيت الكسرة شداني
أني تملي أتحني
وأبقي واحد تاني
وأنسي أني معلم
ويركبني صبياني
أفتح لهم صدري
وأستحمل التنطيط
يا دنيا ليه مسكنه
علي غصون الأمل غربان
ومنتوره في البحر
قروشك وحوش وحيتان
يهدوا علينا العش
وتبقي غش في غش
وقناع صلاح علي الوش
سوسه يطول البيت
حروف أغزلها شبك
يمكن تصيد بكرة
في جو حاله إرتبك
خلي العلم نكرة
حذف الألف واللام
بقت المياة عكرة
ما فاق من السكرة
وسابنا لظيط ومعيط
إرسال تعليق