( يادنيا ليه الخداع ؟ )
يادنيا ليه الخداع؟
مليت أنا منك
طول عمرى أنا متباع
وانت ولا هامك
احصد فى ليلى شوك
واسهر ليالى الشوق
وازرع قلق وشك
عطيانى ليه ضهرك ؟
يادنيا انا مليت
حتى البحور عديت
وطلعت جبل الصبر
وشربت كاسات مر
وأنت ولا هامك
مين اللى باع دمك؟
خلاكى ماتحسى؟
يادنيا ليه الحبيب
يقلب على وشه ؟
ونا كنت بستانه
وكنت انا ورده
وكنت ليه الغطا
وكنت انا فرشه
ليه يحرق البستان
ويشمت الغربان
ويطير العصافير
ويتمادى فى غشه ؟
العيب فى قلبى أنا
ولا ف سواد رمشه؟
يادنيا ليه العذاب
نفسى ف يوم ارتاح
نفسى اشوف الفجر
طارح من الضلمة
ليه يسرقوا الانوار
ليه يبعدوا الأحباب
مش اسمهم ظلمة ؟
الصحبة ليه ساعات
او بالكتير ايام
كأنه ماشافنى
ولا سمع عنى
وينسى حنان حبى
خلاص يادنيا سلام
بينى وبينك خصام
ولا عمرى انده لك
ولا عايزة اشوف وشك
إرسال تعليق