( كحل عنيها يتعاجب )
~~~~~~~~~~~~~
أنا التايه دليلي إحتار
لما قالتلي ياواد اختار
مابين قلبي وبين روحك
لقيت قلبي قايد نار
وانا قلبي مدار لأحلامها
سكنها وضل ..... أيامها
والروح تفديها لو تعرف
واضحي بعمري علشانها
وحبيبتي في كل أحوالها
مابين الغيرة وظنونها
ظلماني ليه ... ودبحاني
وقايدة النار .. بأوهامها
وانا العاشق لأوصافها
وقلبي يحن لو شافها
ويرفع رايته ... ويسلم
عشان تيجي بأشواقها
ويروق الحال ونتهنى
واحني إيديها .... بالحنة
وكحل عينها .... يتعاجب
واشوفها حوريه م الجنه
وأتمنى تلاغيني ملاغيه
واشوفها حمامة الغيه
واكون طيرها واغنيلها
واصونها بروحي وعنيا
ويهدى البال ... ونتعاهد
على الإخلاص ونتواعد
وربنا شاهد على النيه
نكون واحد ... مانتباعد
نكون واحد .... مانتباعد
...............................
بقلم // الفلاح الفصيح
معوض حلمي
منشأة بطاش
دقهلية
===========
إرسال تعليق