حزين عليكِ يا مصر
******
أبكي عليكي يامصر بدمعي... حزين
أصرخ بعلو صوتي..... وكلي شجن و أنين
جوايا فدان حزن والفرح يادوب شبرين
محتار من كتر الوجع أبكي على مين ولا مين
أبكي على أرضي ولا على عرضي
من كل خسيس جبان.. لا ليه ملة ولا دين
أبكي على ولدي وأخويا وأبويا
وابن عمي ولا على كل شهداء المصريين
مايفرقش ان كان مينا ولا محمد.. فكلنا موحدين
لحد امتى يامصر حتفضلي في الحداد اللعين
ويفرح فينا العدو اللئيم و الشامتين؟؟
لحد امتى حيفضل دم جنود ومصليين
ومسالمين خاشعين..يروي شوارع وميادين؟؟
لحد امتى حتفضل أرضنا.. أرض الكنانة
والشهدا والابطال.. تضم ارهابيين غاشمين
نصبوا أنفسهم بجهلهم.. أولياء الله الصالحين
وكفروا وقتلوا من ليس لهم خاضعين
واستباحو دمهم ووصفوهم عاصين كافرين
وهم خفافيش ظلام.. في كل دين ملعونين
بيحاسبوا الخلق على كيفهم
ويقتلوهم ويكونوا لدمهم مستبيحين
وتناسوا أن لله جلاله حكمته
يخلق الخلق على أرضه مختلفين
شعوب كتيرة و لكل واحد دين
نفسي تزول الغُمة ونرجع آمنين فرحانين
وترجع مصر متصانه جوة نن العين
وام الشهيد تمسح دموعها من على خدها الحزين
ومصر بقى تتطهر من كل القتلة المجرمين
وترجع زي ما كانت بلد السلام والآمنين
اللي طول عمرها شعبها اقباط ومسلمين
و يرجع النيل بدل الدم يروى العطشانين
و صوت الفرح يعلى و يخرس الناي الحزين
وترجع مصرقوية صاحبة حضارة الاف السنين
ومن رب العرش متصانة كما ذكرت بكل دين
في الإنجيل مبارك شعب مصر
وفي القرآن ادْخُلُوا مِصْرَ إِنْ شَاءَ اللَّهُ آمِنِينَ
-----------------------
بقلم د/نيفين مطر
25\11\2017
---------------------
إرسال تعليق