ماتت مراتى
........................
ماتت مراتى وودناها المقبرة... وبقت حياتى صعبة اوى مدمرة
من دور بناتى لعبت بيا... بنت حلوة صغيرة
خدعتنى بمعسول كلامها... وخلت حياتي متغيرة
كنت بعطف عليها وهى محتاجة الأمان... ماهي زى بنتى كانت محتاجة الحنان
وبقلب الأب أمنتها... من غدر الدنيا والزمان
لما حكتلى عن حياتها... وشافت م العذاب ألوان
خلتنى أزيد عطفى عليها... لما اشوف دموع عنيها
وبايد امسح دموعها... وبالتانية ائيد شموعها
وقدمتلها اللى اقدر عليه لوجه الله... واقول بناتى مسيرها يوم تلقاه
ماهو اللى عند الله مايروحش... وباقي ليوم فيه نلقاه
وكانت مفاجأة لما قالت بحبك... قولتلها أيوة زى ابوكي تمام
قالت وماله زي بنتك... واكون حبيبتك كمان
انا بحبك... ومش هاكون لغيرك مهما كان
كلمة بحبك كانت تقولها... تملا قلبي بالحنان
ولما تقول بعشقك... كأنى لقلبها سلطان
ولانى فاهم بحكم سنى.. بين العاشقين فرق السنين مالوش مكان
صدقتها وعشت معاها حبها... وكأنى شاب ف ايام زمان
بسهر ليالي ويا النجوم... واقول لقلبى انسى الهموم
واعيش في جوف الليل... ويا حليم وام كلثوم
وفجأة كانت صدمة كبيرة... لما قالت احنا لازم نفترق
لقيتنى عايش في نار وحيرة... وحاسس قلبى بيتحرق
وكأنها الطعنة الأخيرة... وحياتى منى بتتسرق
وسألتها ليه كده... دا انتى اللى قولتى ماليش غيرك ونيس
في حد غيرى دخل حياتك ولا بعتى بالرخيص
ولا دي كات مسرحية... ودوري فيها ورا الكواليس
وفي الوقت المناسب نزلتي الستار... ومن ما احاسب عشت انا قى انهيار
ولما فوقت من صدمتى عرفت كويس غلطتى... انى مشيت ورا الصغار
وهى كان غصب عنها وظروفها كانت اقوى منها
فرضت عليها اللعب ويا الكبار
قالت تلعب بالمشاعروتخلى قلبى بيها شاعر... بعد طول انتظار
لاجل ما ينقطع عنها عطف واحد حس بيها... خلاها عايشة في استقرار
ولما حست بقوة مشاعرى وكبر الحب جوا قلبى... خافت عليا وقررت تنزل الستار
الله يسامحها وانا مسامحها... ومش هامشى تاني ورا الصغار
وعشان هى زى بنتى قررت اعود تانى ليها... أب يحفظ لنفسه الوقار
وهى دى كانت حكايتى لما ماتت مراتى... وودناها المقبرة... ولعبت بيا من دور بناتى بنت حلوة صغيرة
كلماتى.. محمد نبيه المرصفي
إرسال تعليق